കുറുപ്പാശാന്റെ അരങ്ങുപാട്ടുകള്‍

‘സുകുമാര നന്ദകുമാര’-പൂതനാമോക്ഷം

Sun, 18 Oct 2009 07:22:37 GMT

അശ്വതിതിരുനാള്‍ നമ്പുരാന്റെ പൂതനാമോക്ഷം കഥയിലെ ‘സുകുമാര നന്ദകുമാരാ’ എന്ന പദം. കുറുപ്പാശ്ശാന്‍ കഥകളിപദ കച്ചേരിക്ക് പാടിയതിന്റെ ശബ്ദലേഘനമാണിത്. കൂടെ പാടിയിരിക്കുന്നത് ശ്രീ പാലനാട് ദിവാകരന്‍ നമ്പൂതിരി.

‘ഹരിണാക്ഷി’-കീചകവധം

Mon, 05 Oct 2009 16:20:42 GMT

ഇരയിമ്മന്‍തമ്പിയുടെ കീചകവധം കഥയിലെ ഏറ്റവും പ്രശസ്തമായ ‘ഹരിണാക്ഷി’ എന്ന പദം. കാമ്പോജി രാഗത്തിലും ചമ്പടതാളത്തിലുമുള്ള ഈ പദം കുറുപ്പാശാന്‍, നടന്റെ പ്രവൃത്തികള്‍ക്ക് അനുഗുണമായ രീതിയില്‍ ഉജ്ജ്വലമായി പാടിയിരിക്കുന്നു. ശിങ്കിടി പാടുന്നത് ശ്രീ കലാ:ശങ്കരന്‍ എമ്പ്രാന്തിരി.

‘ക്ഷോണീന്ദ്രപത്നിയുടെ’-ദണ്ഡകം (കീചകവധം)

Wed, 09 Sep 2009 16:29:51 GMT

കഥകളിയുടെ തനിമയാര്‍ന്ന ഒന്നായ ദണ്ഡകം തനതു സമ്പൃദായത്തില്‍ ആലപിച്ചിരുന്നു ഉണ്ണികൃഷ്ണക്കുറുപ്പാശാന്‍. ഈ കീചകവധത്തിലെ ദണ്ഡകത്തില്‍ അദ്ദേഹത്തോടോപ്പം പാടിയിരിക്കുന്നത് കലാനി:ഉണ്ണികൃഷ്ണനാണ്.

‘മാനിനീമാര്‍’ (കീചകവധം)

Tue, 08 Sep 2009 10:23:12 GMT

ഇരയിമ്മന്‍ തമ്പിയുടെ ‘കീചകവധം’ കഥയിലെ ‘ഊശാനി‘(ഹുസൈനി) രാഗത്തിലും ചെമ്പട താളത്തിലുമുള്ള ‘മാനിനീമാര്‍’ എന്ന പദം. കീചകന്റെ അപേക്ഷപ്രകാരം സോദരിയായ സുദേഷ്ണ, മാലിനിയെ ഉപായത്തില്‍ കീചകഗേഹത്തിലേയ്ക്ക് പറഞ്ഞയക്കുന്നതാണ് സന്ദര്‍ഭം. കുറുപ്പാശാന്‍ തന്റെ ലാളിത്യമാര്‍ന്ന ശൈലിയില്‍ മനോഹരമായി പാടിയിരിക്കുന്ന ഇതില്‍ കലാനി:ഉണ്ണികൃഷ്ണനാണ് അദ്ദേഹത്തിന്റെ സഹഗായകന്‍.

‘സാദരം നീ’-കീചകവധം

Wed, 29 Jul 2009 07:18:30 GMT

ഇരയിമ്മന്‍ തമ്പിയുടെ പ്രശസ്തമായ ‘കീചകവധം’ ആട്ടകഥയിലെ ‘സാദരം നീ’ എന്ന ‘വേഗട’രാഗത്തിലുള്ള പദം. സവിശേഷപ്രയോഗങ്ങളോടെ ആലപിച്ചിരിക്കുന്ന ഈ ചെമ്പടതാളപദത്തിന് ശിങ്കിടി പാടിയിരിക്കുന്നത് ശ്രീ കോട്ട:പരമേശ്വരന്‍ നമ്പൂതിരിയാണ്.

‘പരിപാഹി’-ദുര്യോധനവധം

Sat, 25 Jul 2009 08:23:59 GMT

ദുര്യോധനവധത്തിലെ പ്രശസ്തമായ ‘പരിപാഹിമാം’ എന്ന ‘നവരസ’രാഗപദം. പാണ്ഡവരുടെ പ്രതിനിധിയായി കൌരവസഭയിലേയ്ക്ക് ദൂതനായി പോകാനൊരുങ്ങുന്ന കൃഷ്ണനോട് പാഞ്ചലി തന്റെ മനോഗതങ്ങളെ അറിയിക്കുന്നതായുള്ള ഈ പദം ചെമ്പട താളത്തിലുള്ളതാണ്. കുറുപ്പാശാന്‍ മനോഹരമായി ആലപിച്ചിരിക്കുന്ന ഇതില്‍ അദ്ദേഹത്തിന് ശിങ്കിടിപാടിയിരിക്കുന്നത് കലാ:ഹരിദാസാണ്.

ദുര്യോധനവധം-ദൂത്(രണ്ടാം ഭാഗം)

Sat, 02 May 2009 07:24:56 GMT

കൃഷ്ണനും ദുര്യോധനനനുമായുള്ള സംസാരമായുള്ള പദങ്ങളാണ് ഈ ഭാഗത്തില്‍ ആദ്യമായ് വരുന്നത്. രാഗമാലികയായിട്ടാണ് ഇത് പാടിയിട്ടുള്ളത്. തുടര്‍ന്ന് ശ്ലോകവും മുമുക്ഷുവിന്റെ പദവുമാണ് ഉള്ളത്. . ശിങ്കിടി:കലാനിലയം ഉണ്ണികൃഷ്ണന്‍.

ദുര്യോധനവധം-ദൂത് (ഭാഗം-1)

Sun, 19 Apr 2009 09:46:53 GMT

ദൂതിനെത്തുന്ന കൃഷ്ണന്‍ ദ്ദൃതരാഷ്ട്രരോട് പറയുന്ന “പാര്‍ഥിവപതേ കേള്‍ക്ക” എന്ന പദമാണ് ആദ്യം.‘പാര്‍ഥിവ’, ‘അര്‍ത്ഥം’ തുടങ്ങിയ പദങ്ങള്‍ക്ക് ഊന്നല്‍ നല്‍കിക്കൊണ്ട് ഭംഗിയായി ഇത് ആലപിച്ചിരിക്കുന്നു കലാ: ഉണ്ണികൃഷ്ണക്കുറുപ്പ് . തുടര്‍ന്ന് ദ്ദൃതരാഷ്ട്രരുടെ “വൃഷ്ണികുലതിലകാ ജയ” എന്ന മറുപടിപദമാണ്. ഇതിന്റെ തുടര്‍ന്നുവരുന്ന ചരണങ്ങള്‍ ദൃതരാഷ്ട്രന്‍ പുത്രനായ ദുര്യോധനനോട് പറയുന്നതാണ്. “ഉണ്ണിയെവിടെ മമ“ എന്ന ഈ ഭാഗം തുടങ്ങുന്നതോടെ പാട്ടില്‍ വാത്സല്യഭാവം നിറയുന്നത് ശ്രദ്ധിക്കുക. . ശിങ്കിടി: കലാനിലയം ഉണ്ണികൃഷ്ണന്‍.

“നാരദമഹാമുനേ” (ബാലിവിജയം)

Wed, 04 Mar 2009 07:20:25 GMT

ബാലിവധം കഥയില്‍ നാരദനോടുള്ള രാവണന്റെ “നാരദമഹാമുനേ” എന്ന പദം കുറുപ്പാശാന്‍ പാടിയത്. അധികമായ സംഗീത/സംഗതി പ്രയോഗങ്ങളില്ലാതെ അഭിനയത്തിനനുശ്രിതമായി വേണ്ടസ്തലങ്ങളില്‍ അക്ഷരങ്ങള്‍ക്ക് ഊന്നല്‍ നല്‍കിയും മേല്‍സ്ഥായിയിലും ആലപിച്ചിരിക്കുന്ന ഇത് കത്തിവേഷങ്ങളുടെ ഘണ്ടാരപദങ്ങള്‍ എങ്ങിനെ പാടണമെന്നുള്ളതിന് ഒരു ഉത്തമ ഉദാഹരണമാണ്. . ശിങ്കിടി:കലാമണ്ഡലം രാമവാര്യര്‍.

“ജയ ജയ രാവണാ”

Tue, 03 Mar 2009 09:43:32 GMT

ബാലിവിജയം കഥയില്‍ ശ്രീനാരദമഹര്‍ഷിയുടെ രാവണസമീപത്തേക്കുള്ള വരവിലുള്ള പദം. ശിങ്കിടി: കലാമണ്ഡലം രാമവാര്യര്‍.

ലളിത-പാഞ്ചാലി(ഭാഗം-2)

Wed, 07 Jan 2009 18:37:51 GMT

കലാമണ്ഡലം ഉണ്ണികൃഷ്ണക്കുറുപ്പ് പാടിയ ‘കിര്‍മ്മീരവധം’കഥയിലെ ‘കാബോജി-ചെമ്പടയിലുള്ള ലളിതയുടെ പ്രസിദ്ധമായ ‘കണ്ടാലതിമോദമുണ്ടായ്‌വരും’എന്ന പദത്തിന്റെ മറ്റൊരു ശബ്ദലേഘനം. ഇവിടെ “കുരവകതരുനിരകളില്‍ “ എന്ന അന്ത്യചരണം രാഗമാറ്റത്തോടെയാണ് കുറുപ്പാശാന്‍ പാടിയിരുക്കുന്നത്. തുടര്‍ന്നുള്ള പാഞ്ചാലിയുടെ “മുഖരയതി ഭൃശമിഹ “ എന്ന ചരണവും വളരെ മനോഹരമായി പാടിയിരിക്കുന്നു. “പെട്ടന്നങ്ങു ഗമിപ്പാനും“ എന്നുള്ള ലളിതയുടെ ചരണമാണ് അന്ത്യത്തില്‍ ഉള്ളത്. കൂടെ പാടിയിരിക്കുന്നത് കോട്ടക്കല്‍ പരമേശ്വരന്‍ നമ്പൂതിരി.

ലളിത-പാഞ്ചാലി(ഭാഗം-1)

Mon, 05 Jan 2009 07:36:12 GMT

കലാമണ്ഡലം ഉണ്ണികൃഷ്ണക്കുറുപ്പ് പാടിയ ‘കിര്‍മ്മീരവധം’ കഥയിലെ നവരസരാഗത്തില്‍ പതിഞ്ഞഅടന്തയിലാരംഭിക്കുന്ന ചിട്ടപ്രധാനമായ ലളിതയുടെ ‘നല്ലാര്‍കുലമണിയും’ എന്നപദത്തിന്റെ മറ്റൊരു ശബ്ദലേഘനം. തുടര്‍ന്ന് അടന്തതാളത്തില്‍തന്നെ യദുകുലകാമ്പോജിയിലുള്ള പാഞ്ചാലിയുടെ ‘ദ്രുപദഭൂപതി തന്റെ’ എന്ന മറുപടിപദവും കേള്‍ക്കാം. അടുത്തത് ‘വനമുണ്ടിവിടെ‘ എന്ന ലളിതയുടെ ചരണമാണ്. ഇതില്‍ ‘വനജാക്ഷീ പോക നാം‘ എന്നുള്ളഭാഗം വെത്യസ്ഥമായി ആവര്‍ത്തിച്ചു പാടുന്നതു ശ്രദ്ധിക്കു... കൂടെ പാടിയിരിക്കുന്നത് കോട്ടക്കല്‍ പരമേശ്വരന്‍ നമ്പൂതിരി.

കിര്‍മ്മീരവധം(ലളിത-പാഞ്ചാലി)

Wed, 29 Oct 2008 11:21:16 GMT

കോട്ടയത്തുതമ്പുരാന്റെ ‘കിര്‍മ്മീരവധം’ കഥകളിയിലെ ലളിത-പാഞ്ചാലി രംഗം അതിമനോഹരമായി ഉണ്ണികൃഷ്ണക്കുറുപ്പാശാന്‍ പാടിയിരുന്നു. കിര്‍മ്മീരവധത്തിലെ ഈ രംഗം മാത്രമായി വതരിപ്പിക്കുന്ന പതിവ് ആ കാലത്ത് അധികമായി ഉണ്ടായിരുന്നു. ഇതിന്റെ ഉദ്ദേശം തന്നെ കുറുപ്പാശാന്റെ അരങ്ങുപാട്ട് കേള്‍ക്കുക എന്നതായിരുന്നുതാനും. കൂടെ പാടിയിരിക്കുന്നത് കലാനിലയം ഉണ്ണികൃഷ്ണന്‍. ആപാദമധുരമാണ് കുറുപ്പാശാന്റെ അരങ്ങുപാട്ട് എങ്കിലും അതിലെ ചില പ്രധാന പ്രത്യേകതകള്‍ പറയുവാന്‍ ശ്രമിക്കട്ടെ..... ‘വിനിശ്ചിതവതീ ഖലു‘ ‘ഭൂത്വാഥ’ എന്നിവിടങ്ങളില്‍ നിര്‍ത്തലോടെ നവരസരാഗത്തിന്റെ മനോഹരിത വെളിവാക്കുന്ന സഞ്ചാരങ്ങളോടുകൂടിയുള്ള ശ്ലോകാലാപനം. നവരസരാഗത്തിലും പതിഞ്ഞഅടന്തയിലാരംഭിക്കുന്ന ചിട്ടപ്രധാനമായ ലളിതയുടെ ‘നല്ലാര്‍കുലമണിയും’ എന്ന പദമാണ് ആദ്യത്തേത്. നിര്‍ഭാഗ്യവശാല്‍ ഇതിന്റെ അനുപല്ലവി വരേയുള്ള ഭാഗങ്ങളെ ഈ ശബ്ദലേഘനത്തില്‍ ലഭ്യമായിട്ടുള്ളു. അടന്തതാളത്തില്‍തന്നെ യദുകുലകാമ്പോജിയിലുള്ള ‘ദ്രുപദഭൂപതി തന്റെ’ എന്ന പാഞ്ചാലിയുടെ മറുപടി പദമാണ് തുടര്‍ന്ന്. ഇതിലെ, ‘മോദ.......മോദവിധായിനി’ എന്ന മുറിച്ചുള്ള പ്രയോഗം, ‘ഞാന്‍ എന്നറിക നീ’ എന്ന പല്ലവി അവസാനിപ്പിക്കല്‍, ‘ദുരിതവൈഭവം’ എന്നിടത്തെ സംഗതി, ‘കാനന....സീമനി’ എന്നുള്ള പിരിച്ചുള്ള ആലാപനം, 'കാനന'എന്നുചൊല്ലി അനുപല്ലവി അവസാനിപ്പിക്കുന്നത്. ‘ഞാനെന്നറിക’ എന്നുള്ള ചേര്‍ത്തു പാടല്‍, ‘ഖ’യ്ക്ക് ഊന്നല്‍ നല്‍കിക്കൊണ്ട് ഉള്ള ‘സുഖമോടെ’, ‘വരുമാശു’എന്നുള്ള നിര്‍ത്തല്‍, എന്നിവ ഈ പദത്തെ മനോഹരമാക്കിതീര്‍ക്കുന്നു. അടുത്തത് ‘വനമുണ്ടിവിടെ‘ എന്ന ലളിതയുടെ ചരണമാണ്. ഇതിലെ ‘വനിതമാര്‍‘ എന്നതു സ്ഥായിതാഴ്ത്തി മനോഹരമാക്കിയിരിക്കുന്നു. അടുത്തശ്ലോകത്തിലെ ‘ദുര്‍ഗ്ഗാവലോകന’ എന്നിടത്തെ സഞ്ചാരം എത്ര ലളിതമധുരമായതാണ്. തുടര്‍ന്ന് കാബോജി-ചെമ്പടയിലുള്ള ലളിതയുടെ പ്രസിദ്ധമായ ‘കണ്ടാലതിമോദമുണ്ടായ്‌വരും’ എന്ന പദമാണ്. ഇതിലെ, ‘കൊണ്ടല്‍നിരതിമിര.......തിമിരമിടയുന്ന’ എന്ന് മുറിച്ചു് കൂട്ടിചേര്‍ത്തുള്ള പ്രയോഗവും, ‘വണ്ടുകളുടനുടനിഹവന്നു’ എന്ന സ്തലത്ത് രംഗത്ത് നടന്‍ വണ്ടുകളുടെ പറക്കല്‍ കാട്ടുമല്ലൊ. അത് സാധാരണ ആദ്യം കുറഞ്ഞകാലത്തിലും ക്രമേണ രണ്ടുപ്രാവിശ്യം കാലം ഉയര്‍ത്തി വേഗത്തിലുമാണ് കാട്ടുക. ഈ ഭാഗത്ത് നടന്റെ ഈ രംഗക്രിയക്കുസഹായകമായി കുറുപ്പാശാന്‍ കാലം ഉയര്‍ത്തി ചേങ്കിലയില്‍ താളമിട്ടുകൊടുക്കുന്നതും, അന്യത്ര ഗായകരില്‍ കാണാത്തതാണ്. ‘കണ്ടു പുനരിണ്ടല്‍‌പൂണ്ടു ബത മണ്ടീടുന്നു’ എന്ന ഭാഗം നടന്‍ നൃത്തത്തോടുകൂടി വിസ്തരിച്ച് അഭിനയിക്കുന്നതിനനുഗുണമായി താളമിട്ട് പാടിയിരിക്കുന്നത് ശ്രദ്ധിക്കു.....

കിരാതത്തിലെ യുദ്ധപദങ്ങള്‍

Tue, 28 Oct 2008 05:24:32 GMT

കിരാതം കഥയിലെ അര്‍ജ്ജുനനും കാട്ടാളനുമായി ഉള്ള യുദ്ധരംഗത്തിലെ പദങ്ങള്‍ ഇത്ര ആര്‍ജ്ജവത്തോടെയാണ് കുറുപ്പാശാന്‍ പാടിയിരിക്കുന്നതെന്ന് ശ്രദ്ധിക്കു. ശിങ്കിടിപാടിയിരിക്കുന്നത് കലാനിലയം ഉണ്ണികൃഷ്ണന്‍.

“ഗൌരീശം മമ”(നാട്ട)

Sun, 26 Oct 2008 16:49:51 GMT

കുറുപ്പാശാന്‍ കിരാതത്തിലെ ‘ഗൌരീശം മമ’ എന്ന പദം പതിവുമോഹനരാഗത്തില്‍ നിന്നും മാറ്റി നാട്ടരാഗത്തില്‍ മനോഹരമായി ആലപിച്ചിരിക്കുന്നു. ശിങ്കിടിപാടിയിരിക്കുന്നത് കലാനിലയം ഉണ്ണികൃഷ്ണന്‍.